Бастыҥтан бастыҥнар

Үөһээ Бүлүү сэлиэнньэтин дьаһалтатын баһылыга Николай Николаев сыллата тэрийэр үөрүүлээх түһүлгэтэ П.Тобуруокап аатынан сынньалаҥ киинигэр буолла. Бу дьоро күн оскуолалар, тэрилтэлэр, биирдиилээн дьон уонна түөлбэлэр икки ардыларыгар ыытыллар «Бастыҥ хаар, муус оҥоһук» күрэс түмүктэрин таһаардылар, 2016 сыл түмүгүнэн үлэ үөһүгэр сылдьар үтүө-мааны дьону чиэстээтилэр. «Бастыҥ хаар, муус оҥоһук» дьиэ кэргэнинэн уонна биирдиилээн дьон күрэстэригэр «Бастыҥ хаар, муус оҥоһуктаах тэлгэһэ» — Лидия уонна Анатолий Лыткиннар, «Бастыҥ киэргэтиилээх тэлгэһэ» — Людмила уонна Вячеслав Сидоровтар буоллулар. «Саҥа Дьыл үөрүүтүн бэлэхтээбит түөлбэ» — «I-кы Билиилээх» түөлбэ (сал.Наталья Васильева), «Бастыҥ киэргэтиилээх маҕаһыын» аатын Люция Спиридонова салайааччылаах «Бэллэкэ» маҕаһыын ылла. «Бастыҥ Тымныы оҕонньор уонна Хаарчаана оҥоһуктаах оскуола» — М.Алексеев аатынан лицей-интернат (дир.Т.Блинова), «Бастыҥ муус оҥоһук композиция» — И.Н.Барахов аатынан 1 №-дээх орто оскуола (дир. А.Захаров), «Бастыҥ киэргэтиилээх үөрэх салаатын тэрилтэтэ» — 1 №-дээх «Ньургуһун» оҕо сайдар киинэ (сэб.М.Григорьева), «Бастыҥ муус оҥоһуктаах тэрилтэ» — М.Егоров аатынан 2 №-дээх орто оскуола (дир. А.Федоров), «Бастыҥ 2017 сыл бэлиэтин – Бөтүүгү оҥорбут тэрилтэ» — Үөһээ Бүлүүтээҕи «Вилюйавтодор» кэллэктиип (сал.И.Васильев), «Саҥа Дьыллааҕы бастыҥ киэргэтиилээх тэрилтэ» — 12 №-дээх улуустааҕы баһаарынай этэрээт (сал.В.Новиков) буоллулар. Галина Цой, Нина уонна Иван Васильевтар, Изольда уонна Родион Егоровтар, Татьяна уонна Василий Титовтар дьиэ кэргэттэрэ күрэскэ көхтөөх кыттыыларын иһин махтал суругунан бэлиэтэннилэр. Сэлиэнньэ тупсаҕай көстүүлээх, ыраас буоларын туһугар кыһамньыларын уурбут бастыҥ тэрилтэлэр ааттаннылар. Ол курдук, үһүс миэстэ – М.Алексеев аатынан лицей-интернат, иккис – М.Егоров аатынан 2 №-дээх орто оскуола, бастакы миэстэни И.Барахов аатынан 1 №-дээх орто оскуола ылла. «Бастыҥ үлэлээх түөлбэ» аатыгар Наталья Морфунова салайааччылаах «Кэлтэгэй» түөлбэ, «Бастыҥ сибэккинэн композициялаах оскуола» — М.Егоров аатынан 2 №-дээх орто оскуола тигистилэр. «Бастыҥ тэлгэһэлээх ыал» номинацияҕа иккискэ Валентина, Николай Борисовтар, бастакы миэстэҕэ Ариадна, Макар Павловтар дьиэ кэргэттэрэ таҕыстылар. «Тупсаҕай оҥоһуулаах тэлгэһэ» номинация хаһаайыттарынан Стелла, Александр Антоновтар буоллулар. Дьоро күҥҥэ үрдүк наҕараадлары туттарыы үөрүүлээх быһыыга-майгыга ааста. Ол курдук, сэлиэнньэ культурнай-общественнай олоҕор бэриниилээх үлэлэрин иһин «Үөһээ Бүлүү сэлиэнньэтин бочуоттаах олохтооҕо» үрдүк ааты үлэ бэтэрээнигэр, «Дьүөгэ» түмсүү көхтөөх кыттааччытыгар Тамара Степановаҕа, СӨ норуот хаһаайыстыбатын үтүөлээх үлэһитэ, Коммунистическай партия Үөһээ Бүлүүтээҕи комитетын салайааччы, «Партийнай килбиэн» орден кавалерыгар Георгий Степановка иҥэрдилэр. Дохсун ытыс тыаһыгар доҕуһуоллатан Бочуот кинигэтигэр киирбиттэрин туоһулуур сибидиэтэлистибэни үлэ бэтэрээнигэр Светлана Портнягинаҕа, милиция капитана, худуоһунньук-дизайнер Анатолий Чоросовка, үлэ бэтэрээнэ, ытык кырдьаҕас Анна Харлампьеваҕа, үлэ бэтэрээнэ, «Дьулуур» эбээлэр түмсүүлэрин көхтөөх кыттааччыта Клавдия Прокопьеваҕа туттардылар. Дьиэ кэргэн сыаннастарын өрө тутан, таптал уонна бэриниилээх буолуу үтүө холобуругар элбэх оҕону төрөтөн, үөрэхтээн, төрөөбүт дойдуларыгар, обществоҕа туһалаах дьону иитэн таһаарбыттарын иһин «Таптал уонна бэриниилээх буолуу» түөскэ кэтиллэр анал бэлиэнэн Светлана, Александр Ивановтар наҕараадаланнылар. Маны сэргэ, «Сыл бастыҥ ыччата» — М.Егоров аатынан 2 №-дээх орто оскуола учуутала Тихон Егоров, «Сыл бастыҥ спортсмена» — улуус волейболга хамаандатын тренерэ Евдокия Александрова, «Сыл бастыҥ урбаанньыта» — «Персона» салон хаһаайката Мария Ушницкая, «Сыл бастыҥ культура үлэһитэ» — Оҕо кинигэни ааҕа үөрэнэригэр саҥа компьютернай технологияны киллэрбит Үөһээ Бүлүүтээҕи оҕо библиотекатын сэбиэдиссэйэ Антонина Семенова, «Тыа хаһаайыстыбатын бастыҥ үлэһитэ» — «Тиит» потребительскай кооператив салайааччыта Василий Ласточкин, «Бастыҥ информационнай сырдатааччы» — улуус хаһыатын таһааччы Сайаана Саввина, «Сыл бастыҥ олох-дьаһах, коммунальнай хаһаайыстыба үлэһитэ» — Үөһээ Бүлүүтээҕи ОДьКХ суоппара Андрей Селясинов, «Сыл бастыҥ салайааччыта» олохтоох дьон үлэнэн хааччыллалларыгар сөптөөх усулуобуйаны тэрийэр улуус биир улахан предпринимателэ Семен Тумусов буоланнар бар дьоннорун үөртүлэр. Оҕону айылҕаны кытары алтыһыыга, төрөөбүт дойдутун үөрэтиигэ киллэрбит өр сыллаах кылаатын, үтүө суобастаах үлэтин сыаналаан, М.Алексеев аатынан лицей-интернат кылаас таһынан үлэни тэрийээччи учуутала, СӨ үөрэҕирии туйгуна Сардаана Захароваҕа «Сыл бастыҥ ситиһиитэ» анал ааты туттардылар. Саҥа ньымалары баһылаан, нэһилиэнньэ чөл туруктаах, доруобай буоларын туһугар уустук операциялары миэстэтигэр оҥорору ситиспитин иһин «Сыл бастыҥ доруобуйа харыстабылын эйгэтин үлэһитэ» анал аат улуустааҕы киин балыыһа хирургияҕа отделениетын сэбиэдиссэйигэр, СӨ доруобуйа харыстабылын туйгунугар, үрдүк категориялаах хирург бырааска Николай Сивцевкэ, Онтон «Сыл бастыҥ үөрэҕин эйгэтин үлэһитэ» — М.Алексеев аатынан лицей-интернат олоххо куттал суох буолуутун хааччыйар үөрэх учуутала, РСФСР үөрэҕириитин туйгуна, «Гражданскай килбиэн» бэлиэ хаһаайына, учууталлар Учууталлара Григорий Золотаревка ананнылар. Доруобуйаларынан хааччахтаах дьон кыһалҕаларын быһаарыыга, олоххо көрсөр ыарахаттары чэпчэтиигэ, социальнай көмөлөрү оҥорууга үгүс үтүөлээх улуустааҕы доруобуйаларынан хааччахтаах дьон уопсастыбаларын бэрэссэдээтэлигэр Зоя Петроваҕа «Сыл бастыҥ общественнай түмсүүтэ» анал аат туттарылынна. Алаһа дьиэни арчылаан, биир өйүнэн-санаанан салайтаран, ыал буолан олорбуттара 50 сылларынан эҕэрдэлээн туран, «Сыл бастыҥ ытык ыала» үрдүк ааты Ибаррури, Василий Васильевтарга иҥэрдилэр. Кыайыылаахтары, наҕараадаламмыттары Юрий Васильев-Дьурай, Вилена Ларионова, Иван Лаврентьев, Мария Алексеева, Николай Осипов, Мария Донская, Аркадий Васильев, Эдуард Николаев, «Үрдэл» вокальнай ансаамбыл, «Тосхол» үҥкүү бөлөҕө, ыалдьыт Иван Дьячковскай-Кыталык Уйбаан, о.д.а. улууспут киэн туттар ыччаттара ылбаҕай ырыаларынан, үҥкүүлэринэн эҕэрдэлээтилэр. 1 из 10