Быыстапка-дьаарбаҥкаҕа ас-үөл эгэлгэтэ тардылынна
Кэбээйи улууһугар, Сангаарга, улуус киинин олохтоохторугар улахан кэтэһиилээх үгэс буолбут “Олохтоох бородууксуйа-2016” тыа хаһаайыстыбатын табаары оҥорооччуларын быыстапка-дьаарбаҥката буолла. Бөһүөлэк киинигэр турар спорт саала киэҥ киэлитин тухары тыа хаһаайыстыбатын кэпэрэтииптэрэ, бааһынай уонна кэтэх хаһаайыстыбалар, үүтү соҕотуопкалыыр уонна кондитерскай аһы-үөлү оҥорор тэрилтэлэр эгэлгэ астарын сандалы хотойорунан тартылар. Быыстапка-дьаарбаҥка кыттыылаахтарын тэрээһин аһыллыытынан “Кэбээйи улууһа” МТ баһылыгын бастакы солбуйааччы Степан Павлов, “Сангаар бөһүөлэгэ” МТ баһылыга Николай Попов, “Тыа хаһаайыстыбатын управлениета” МКТ салайааччы Айсен Татаринов эҕэрдэлээтилэр. “Улууспутугар 12 нэһилиэк баарыттан бүгүҥҥү дьаарбаҥкаҕа 10 нэһилиэк бэрэстэбиитэллэрэ айан уустуктарын, ырааҕын аахсыбакка кэлэн тураллар. Барыта 48 хаһаайыстыба, 80-тан тахса кыттааччы түмүстэ, о.и. бу тэрээһиҥҥэ куруутун кыттар улуус бөдөҥ хаһаайыстыбалара: “Кэбээйи”, “Томтор”, “Сайылык”, МТС кэпэрэтииптэр, “Сангаардааҕы”, “Унаардаах”, соҕотуопкалыыр тэрилтэлэр, биирдиилээн кэтэх хаһаайыстыбалар уо.д.а.”, — диир Айсен Дмитриевич. “2016 сылы улууспут тыатын хаһаайыстыбатын үлэһиттэрэ ситиһиилээхтик түмүктээн эрэллэр. Ол курдук, бырабыыталыстыба тиэрдибит 17 сорудаҕыттан 14 көрүҥэр былааннарбытын толордубут. Оттооһуҥҥа былааммытын толорон сүөһү кыстыгын этэҥҥэ туоруур кыахтанныбыт. Отторо тиийбэт “Ворошилов” уонна “Кэбээйи” кэпэрэтииптэргэ көмө оҥоһуллар. Үүнэр 2017 с. үлэҕитигэр-хамнаскытыгар өссө үрдүк ситиһиилэри баҕарабын! “, — диэтэ. Бу күн Сангаар олохтоохторо бырааһынньыктааҕы уонна кыһыҥҥы аһыыр астарын хамаҕатык атыыластылар. Убаһа, сылгы, сибиинньэ, ынах этэ, ынах арыыта, үүттэн бородууксуйалар, куобах, хаас, сүөһү хара иһэ, оҕуруот аһа, кондитерскай оҥоһуктар, Ньидьили собото талбыта тардылынна. Барытын ааҕан сиппэккин. Мин көрүүбэр, сүрүн бородууксуйаларга сыана билиҥҥи кэмҥэ сөбүгэр курдук. Холобур, ынах арыыта — 400-420 солк. , ынах этэ — 400-450 солк., убаһа этэ — 450 солк., үүт киилэтэ…. — 60-80 солк. Дьаарбаҥка кэмигэр ыраахтан кэлбит икки кыттааччыны кытта кэпсэттим. —Кыһыл Сыыртан дойдубар кэлэн быыстапка-дьаарбаҥкаҕа кытта сылдьабын. Сибиинньэ иитиитинэн дьарыктанабын. Биһиэхэ, Бүлүүгэ, уотурбабыт сыаната ыарахана бэрт, куула 1300-1500 солк. тиийэр, онон ыарахаттары көрсөбүн да буоллар, хаһаайыстыбабын тутан олоробун. Манна дьаарбаҥканы үчүгэйдик тэрийэллэр, онон сыл аайы кэлэн кыттабын. Быйыл сибиинньэ, ынах, убаһа этэ, хаан, ис, собо, Бүлүү куобаҕын аҕаллым. Атыым этэҥҥэ бара турар, дьон ылаллар”, — диир Бүлүү урбаанньыта Владимир Иванов. “Мукучу нэһилиэгиттэн тыа хаһаайыстыбатын исписэлииһэ Анна Гаврильева салалтатынан “Унаардаах”, “Сайылык” МТС, уонна “Билиилээх” кэпэрэтииптэр кэллибит. Сайылыктан бэҕэһээ киэһэ 7ч.30 мүн. туран баран, Сангаарга сырсыарда 7 чааска кэллибит. Кэбээйиттэн бэттэх суол бэлиэлэрэ суохтар эбит. Суоппар эрэ барыта уопуттаах буолбатах, айан араас, халлаан тымныы. Ол-бу быһылаан тахсыбатын туһугар суолга ыйынньыктары туруоруохтарын наада дии саныыбын. Үлэбит-хамнаспыт туһунан кыратык сырдаттахха, “Билиилээх” бааһынай хаһаайыстыбатын кэргэним Сергей Новиков улууска биир бастакынан, 1991 сыллаахха, тэрийбитэ. Оттон быйыл олохтон хомолтолоохтук туораата. Өр сылларга араас ыарахаттары көрсөн, сыралаһан үлэлээн, барыска дьэ таҕыстыбыт. Дьаарбаҥкаҕа саҥа кыттабыт. Убаһа этиттэн уонтан тахса бүлүүдэни астаан аҕаллыбыт. Эмис убаһа этэ 450 солк. Убаһа тыҥатынан соҕуону (зобу) эмтииллэринэн, оттон миэйиитин сүһүөх ыарыыларыгар туһаналларынан анаан аҕаллыбыт. Биһиэхэ ыраах сиртэн кэлээччилэргэ ороскуоттаах эрээри, маннык тэрээһин ыытыллара үчүгэй бөҕө буоллаҕа дии. Атын дьону көрөн үлэ үөрүйэҕин атастаһаҕын, бэйэҕин көрдөрөҕүн”, — диэн кэпсээтэ Ксения Новикова. Сангаарга олохтоох сибиэһэй аһы-үөлү дьон-сэргэ хаһан баҕарар кэтэһэр, үөрүүнэн атыылаһар. Онон дьаарбаҥка көхтөөхтүк барар. “Кыһын устата сиир эппин, арыыбын уонна 1 тыһ. солк. куобах ыллым. Тыабыт сирин үлэһиттэрэ маннык киирэн бэйэлэрин астарын-үөллэрин атыылыыллара олус үчүгэй. Мин сыл ахсын сылдьабын. Дьаарбаҥка тэрээһинэ эмиэ үчүгэй, ас-үөл арааһа элбэҕэ киһини сөхтөрөр. Тэрийээччилэргэ уонна ороскуоттарын аахсыбакка, биһиэхэ сибиэһэй, бэйэлэрэ оҥорон таһаарбыт астарын-үөллэрин атыылыы кэлбит үлэһит дьоҥҥо махтал буоллун”, — диир бөһүөлэк олохтооҕо Валерий. Быыстапка-дьаарбаҥка түмүгүнэн, уопсайа 2 мөл 600 тыһ. чугаһыыр суума киллэриллибит. Бу ааспыт сыллааҕар балачча улахан көрдөрүү буоларын тэрийээччилэр бэлиэтээтилэр. Чахчыта, тэрээһин өрө көтөҕүллүүлээхтик ыытылынна, ситиһиилээхтик түмүктэннэ. Манна кыттыбыт уонна ас-үөл эгэлгэтин атыыласпыт дьон бары астынан тарҕастылар. Түмүккэ дохсун ытыс тыаһыгар арыаллатан, анал номинациялар туттарылыннылар. Ол курдук, «Бастыҥ нэһилиэк» аатын Кэбээйи нэһилиэгэ ылан үөрүү-көтүү буолла. «Бастыҥ тыа хаһаайыстыбатын тэрилтэтэ» – «Сайылык» МТС ТХПК, «Бастыҥ бааһынай хаһаайыстыба» – Таыайаттан А.Тарасова хаһаайыстыбата, «Бастыҥ кэтэх хаһаайыстыба» – Куокуйтан Ф.Алексеев, астыыр-үөллүүр тэрилтэлэргэ бастыҥынан Куокуйтан «Сангаардааҕы» кооператив, килиэби, кондитерскай бородууксуйаны астааһыҥҥа бастыҥ үлэлээх тэрилтэнэн Сииттэттэн С.Николаева, уо.д.а. ааттаннылар. Маны сэргэ «Саамай эмис убаһа этэ», «Саамай эмис ынах этэ», «Саамай бөдөҥ собо» анал бириистэр туттарылыннылар. 1 из 12
