Бүлүүлэр “Идэһэ — 2016” дьаарбаҥкаҕа 7 мөл. солк. суумаҕа эт, балык атыыластылар

Сэтинньи 25 күнүгэр Бүлүү куоратыгар “Алгыс” СК иһигэр, таһыгар тэриллибит улуустааҕы “Идэһэ — 2016” дьаарбаҥканы олохтоохтор, ыалдьыттар улаханнык сэҥээрдилэр. Урукку курдук таһырдьа тымныыга тоҥмокко-хаппакка, сылаас дьиэ иһигэр сылдьан эмис эти, балык арааһын, ол иһигэр кыһыллар балыгы, сылгы иһин, куобаҕы, мас көтөрүн, тоҥ быары, эриллибит эти, тоҥ үүтү, чохоону уо.д.а. сибиэһэй аһы-үөлү көрөн, талан атыылаһар табыгастааҕа биллэр. СК таһыгар таһырдьа эти, балыгы миэстэнэн атыылаабыттара эмиэ атылаһааччыга табыгастаах буолла. Бу күн ынах этин биир киилэтин түөрт мөһөөккө, убаһа этин – 420 солк., собону — 120 солк. атыылаатылар. Дьаарбаҥканы иҥэн-тоҥон кэрийбиттэр арыый кыра сыанаҕа олохтоох бородууксуйаны, ол иһигэр Бүлүү мүөтүн, сырын кытта атыыластылар. Сыры оҥоруунан улууска лөкөчөөннөр бастаан дьарыгырбыт буоллахтарына, кэлин дьөккөннөр ылыстылар, кинилэр “Адыгейскай” сырдара дьаармаҥкаҕа хамаҕатык барда. Дьаарбаҥкаҕа барыта 18 нэһилиэк, 5 производственнай кооператив, “Сыа Бүлүү” улуустааҕы астыыр-үөллүүр потребительскай кооператив, Ньурбатааҕы көтөр фабриката, Үөһээ Бүлүүттэн “Нам” ХЭУО кытыннылар. Тыа хаһаайыстыбатын департаменын салайааччытын солбуйааччы Варвара Гаврильева билиһиннэрбитинэн, бу күн быһа холоон ааҕыынан 7 мөл. солк. олохтоох бородууксуйа атыыламмыт. Үгэс быһыытынан тэрийэр хамыыһыйа дьаарбаҥка кыайыылаахтарын быһаарбыт. Ол курдук, нэһилиэктэр ортолоругар улуус уһук хоту өттүгэр сытар ынах сүөһү эмис этин, бөдөҥ собону, быйыты, сордоҥу киллэрбит Октябрь Лукин баһылыктаах Үгүлээт нэһилиэгэ кыайыылааҕынан ааттанна. Иккис миэстэни Альбина Ионова баһылыктаах тыа хаһаайыстыбатын бородууксуйатын эгэлгэтин дьаарбаҥкаҕа киллэрэн батарбыт Дьөккөн нэһилиэгэ ылла. Үһүс миэстэҕэ Светлана Игнатьева баһылыктаах эмиэ уһук хоту сытар II Күүлэт нэһилиэгэ таҕыста. Тыа хаһаайыстыбатын кооперативтарын ортолоругар Максим Яковлев салайааччылаах элбэх эти киллэрбит “Мастаах” кооператив дьаарбаҥка кыайыылааҕынан ааттанна, иккис миэстэҕэ Екатерина Максимова салайааччылаах “Халбаакы”, үһүскэ – Елена Тутукарова салайааччылаах “I Күүлэт” производственнай кооперативтар таҕыстылар. 1 из 13 Бааһынай хаһаайыстыбалар, тыа хаһаайыстыбатынан дьарыктанар биирдиилээн предпринимателлэр ортолоругар бастакы миэстэни Кыргыдайтан Анастасия Кырбасова, иккиһи Дьөккөнтөн Иван Ионов, үсүһү Лөкөчөөнтөн Максим Харлампьев ыллылар. Биирдиилэн көрүҥнэргэ эмиэ бастыҥнар быһаарылыннылар. “Араас эгэлгэ бородууксуйа иһин” көрүҥҥэ “Тоҕус” ПК, Виктория Сыромятникова, “Саамай көхтөөх кыттааччы” көрүҥэр Чочуттан Мария Борисова, “Атыылыыр сири бастыҥ киэргэтии иһин” көрүҥҥэ II Күүлэт нэһилиэгэ, баһылык Светлана Игнатьева, кыайыылааҕынан ааттаннылар. Бүлүүлэр улуустааҕы дьаарбаҥкаттан кыһын сиир идэһэлэрин, балыктарын үөрэ-көтө атыылаһан хаһааннылар.