Үлэ сыһыанын сокуонунан олохтууру, хамнаһы сөпкө уонна чиэһинэйдик биэриини хонтуруоллуур улуус хамыыһыйата куорат ырыынактарыгар рейдэ оҥордо. Хамыыһыйа бэрэссэдээтэлэ Светлана Алексеевна Третьякова, Нэһилиэнньэ дьарыктаах буолуутун Киинин салайааччыта Галина Егоровна Михайлова, ИДьМ Орто Халыматааҕы отделениетын учаскуобайдарын начаалынньыктара Алексей Ионович Алексеев уонна СӨ 8 №-дээх федеральнай нолуок сулууспатын оройуоннар икки ардыларынааҕы инспекциятын кылаабынай инспектора Виктор Николаевич Докторов «Ярмонга» уонна Ярославскай уулусса ырыынактарыгар сылдьан, урбаанньыттар уонна атыыһыттар үлэлэрин сыһыаннарын бэрэбиэркэлээтилэр. Уопсайа 15 бэрэбиэркэлэммититтэн, 1 эрэ киһи дуогабардаах үлэлии турар. Ким эрэ саҥа үлэҕэ киирбитин, кэтээн көрөр болдьохтооҕун, оттон ким эрэ көмөлөһөр ааттаах үлэлиирин эттэ. Сорохтор хас хамнаска үлэлииллэрин да билбэттэр. Онон, бэрэбиэркэ түмүгүнэн, урбаанньыттар атыылыыр миэстэлэригэр саҥа көспүт буоланнар, докумуоннарын илдьэ сылдьыбаттара, «Потребительскай уголок» диэн суоҕа, атыыһыттар дуогабара суох үлэлии тураллара билиннэ. Икки урбаанньыт хамыыһыйа иннигэр отчуоттанарыгар сурук бэрилиннэ. „ХАЛЫМА ДОЛГУННАРА“ хаһыат