Кырдьаҕастарга босхо көмөлөһөр уолаттар

Сунтаарга бу күннэргэ «аҕам саастаах, кыаммат дьоҥҥо буор босхо мас хайытабыт, туруорабыт» диэн ис хоһоонноох биллэрии ватсап ситимин түргэнник толордо. Дьон-сэргэ ону көрөн утуу-субуу биллэриинэн эрийэн, «кырдьык эбит. Сунтаар уолаттара. Сакаастааҥ» диэн бэйэ-бэйэлэрин кытта суруйсан, үөрүүлээх сонуну үллэстибитинэн барбыттара. Биһиги ону мүччү туппакка эмиэ эрийдибит, эрэдээксийэҕэ ыҥырдыбыт. Уолаттарбыт кэлэн кэпсэтэргэ сөбүлэстилэр. Маннык үтүөкэн санаалаах, дьоҥҥо үчүгэйи оҥорор, кыаммакка, кырдьаҕаска көмөлөһөр баҕалаах көрсүө-сэмэй уолаттар Борис Егоров уонна Айаал Саввинов 1 №-дээх оскуола 11-с кылааһыгар үөрэнэллэр эбит. – Ватсап ситимигэр Ньурба уолаттарын биллэриитэ тарҕаммыт этэ. Онно дьон «дэлэҕэ даҕаны, Сунтаар уолаттара босхо мас хайыппаттар ини» дэспиттэрин көрбүппүт. Ол иһин, онно хардары хоруйдаан, Ньурба уолаттарын үтүө суолларын батыһан, биһиги эмиэ кырдьаҕас, кыаммат дьоҥҥо көмөлөһөргө санаммыппыт. Кырдьаҕастар дьиэ тас үлэтигэр көмөҕө наадыйалларын биһиги эмиэ өйдүүбүт. Онон үлэбитин бу күннэргэ саҥа саҕалаатыбыт. Дьон бөҕөтө эрийэр. «Кырдьык дуо?» диэн ыйыталаһаллар. Үөрэнэн бүтэн баран, эбиэт кэннэ биирдэ барар кыахтаахпыт. Онон бириэмэбит кылгас да буоллар, күн аайы үлэх киирэр. Оччоҕуна төһө кыалларынан баран үлэлээн, эрэннэрбиппитин толорорго кыһаллабыт, – диэн уолаттар кэпсээтилэр. Маннык сырдык, үтүө санаалаах сүрэхтээх, үлэһит уолаттар биһиги Сунтаарбытыгар баалларыттан улаханнык үөрдүбүт, киэн тутуннубут уонна, биллэн туран, хайҕаатыбыт. Дьон истиҥ махтала, үтүө тыла, алгыһа хайдах да элбэх харчытааҕар таһыччы сыаналаах. Онон эдэркээн уолаттартан холобур оҥостон атыттар да аҕам саастаахтарга көмөлөһөргө турунуохтара диэн эрэнэбит. Үтүө ыччаттаах дойду – кэрэ кэскиллээх.