Полиция подполковнига А.Я.Корнилов начаалынньыктаах РФ ИДьМ Сунтаардааҕы отделын үлэһиттэрэ бэйэлэрин идэлээх бырааһынньыктарын уратытык бэлиэтиир үтүө үгэстээхтэр. Кинилэр отделларын сотрудниктарын күүһүнэн Тойбохойдооҕу оҕо киинин иитиллээччилэригэр анаан аһымал кэнсиэр көрдөрөллөр. Бу да сырыыга оннук буолла. Бырааһынньыктарын күн улуус киининээҕи «Партизан» култуура киинигэр бэрээдэги араҥаччылааччылары улуус баһылыгын үпкэ, экэниэмикэҕэ уонна стратегическай сайдыыга солбуйааччы Максим Прокопьев, Сунтаар нэһилиэгин баһылыгын солбуйааччы Валерий Макаров, Тойбохойдооҕу оҕо кииниттэн Иван Иванов эҕэрдэлээтилэр. Ол кэнниттэн биһиги нус-хас олохпут туһугар күнүстэри-түүннэри түбүгүрэр дьоммут ис дууһаларыттан ыллаан-туойан,үҥкүүлээн-битийэн, көрү-күлүүнү көҕүлүттэн тутан, чахчы да дьоро киэһэни бэлэхтээтилэр. Кэнсиэри улууска участковай инспектордар салайааччыларынан ананан үлэлии кэлбит, өрөспүүбүлүкэҕэ ырыа күрэстэрин хас да төгүллээх лауреата, полиция майора Степан Кардашевскай, каадыр боппуруостарыгар начаалынньык көмөлөһөөччүтүнэн үлэлиир ис сулууспа подполковнига Валентина Алексеева ырыалара киэргэттэ. Кинилэр кэрэ куоластарынан сунтаардар куттарын тутуохтарын туттулар. Бэртээхэй кэнсиэри улуустааҕы култуура управлениетын начаалынньыга Мария Кобельянова уонна ыраах Смоленскайтан кэлэн үлэлии сылдьар полиция майора Николай Иванов иилээн-саҕалаан ыыттылар.