Моорукка уонна Мэлдьэхсигэ «күөх төлөн» күлүбүрээтэ

Быйыл күһүн Мэҥэ Хаҥалас улууһун Бөкө уонна Бэдьимэ нэһилиэктэригэр гаас киирбитэ. Итинтэн уһаабакка, сэтинньи 30 күнүгэр, Моорук уонна Мэлдьэхси нэһилиэктэригэр гаас ситимэ тиэрдиллибитин туоһулуур үөрүүлээх түгэҥҥэ олохтоохтор көхтөөхтүк кытыннылар. -Биһиги бу күнү долгуйа күүппүппүт өр буолла. Бүгүн «күөх төлөн» нэһилиэк 30 ыалыгар киирэн дьиэлэрин сылытта. Хаалбыт ыалларга гаас ситимэ тиэрдиллиэ. Киллэттэрэргэ бэлэм олороллор, үгүстэр анал аадырыстаах субсидияны туһаныахтара. Онон ааһан эрэр сыл биһиэхэ элбэҕи бэлэхтээтэ. Ол курдук, нэһилиэккэ диэри аспаал суол оҥоһулунна. Сибээспит үчүгэй. Аны туран, «күөх төлөн» күлүбүрүү умайда, – диэн Моорук баһылыга Петр Яковлев үөрүүтүн үллэһиннэ. —Биһиэхэ эдэр дьон көһөн кэлиилэрэ лаппа элбээтэ. Онон оҕо төрөөһүнэ үксээтэ. Быйыл нэһилиэкпитигэр 12 кырачаан күн сирин көрдө. Кыһалҕаны эрдэтинэ быһаарар туһуттан, саҥа оҕо саадын тутуута былааҥҥа киллэриллибит. Аны «Күөх төлөн» кэлэринэн, үгүс ыал дьиэлэрин аныгы олох сиэригэр сөп түбэһиннэрин оҥоһуннулар, – диир нэһилиэк олохтооҕо Анастасия Апросимова. Мэлдьэхсилэр эмиэ бу «күөх төлөнү» кэтэспиттэрэ ырааппыт. Степановтар дьиэ кэргэн сайын дьиэлэрин өрөмүөннэммиттэр. «Гааска холбонуохпутуттан дьиэбит олус сылыйда. Анал билиитэҕэ аспытын олус түргэнник буһарабыт. Ол үлэлии-хамсыы сылдьар дьоҥҥо бэрт. Гаас ситимин киллэрбит исписэлиистэргэ махталбын тиэрдэбин! Хайдах туһанарбытыгар тиийэ барытын сиһилии быһааран, кэпсээн биэрдилэр», – диэн дьиэ хаһаайката Анастасия Степанова кэпсиир. 1 из 3