Дьааҥыга Ыччат сылын тэрээһиннэрэ
Дьааҥы улууһугар Ыччат сылын аһыллыытыгар аналлаах араас тэрээһин ыытылынна. Ол курдук, Баатаҕай бөһүөлэгэр нэһилиэк ыччаттарын түмсүүлэриттэн уопсайа 154 дэлэгээт кэлэн көхтөөх көрсүһүү, дьыалабыай кэпсэтии буолла. Улуустааҕы психологическай көмө киинин үлэһиттэрэ ыччаттар билсэллэригэр, инникитин доҕордуу буолалларыгар көмөлөһөр тренинг тэрийбиттэрин улаханнык сэргээтилэр. Маннык тэрээһини кэмиттэн-кэмигэр ыытары наадалааҕынан аахтылар. Дьокуускайтан Ирина Иванова (СӨ Ыччат дьыалатыгар уонна дьиэ кэргэн бэлиитикэтигэр министиэристибэ исписэлииһэ), Ариан Сергеев (СӨ Ыччат бырабыыталыстыбатын бэрэссэдээтэлин солбуйааччы) кытыннылар, «Миниистир», «Эдэр фермер» диэн дьыалабыай оонньуулар сыалларын-соруктарын, киһиэхэ оруолларын кэпсээтилэр. Түмсүүлэр ортолоругар «Молодежь – инновационный ресурс Верхоянья», күрэхтэһии ураты сэргэх буолла. Бырайыак экиспиэрдиир хамыыһыйатыгар улуус Дьокутааттарын сэбиэтин бэрэссэдээтэлэ А.Мукминов, оройуон сэбиэтин дьокутаата Т.Божедонова, И.Иванова, А.Сергеев, өрөспүүбүлүкэтээҕи «Миниистир» дьыалабыай оонньуу кыттыылааҕа Р.Бойко, ТХС салайааччыта С.Быков, урбаанньыттары өйүүр киин сэбиэдиссэйэ М.Садовникова үлэлээтилэр. Дьыалабыай оонньуу түмүгүнэн, бырайыагы көмүскээччилэртэн бастыҥнарынан Арыылаах нэһилиэгин ыччатын «Тэтим» түмсүүтэ буолла. Кинилэр «Күн сыламын төгүрүк сыл туһан» («Бери луч целый год») бырайыагынан өрөгөй үктэллэннилэр. Маны таһынан, «Миниистир» өрөспүүбүлүкэтээҕи оонньууга быһа киирэр кыахтаннылар. Бу күн киэһэ Баатаҕайдааҕы Култуура уонна спорт киинигэр үгэскэ кубулуйбут «Ыччат баала» буолла. Манна вальска күрэстэһии буолла. «Венский вальс», «Вальс золотого поколения» үҥкүүнэн улуус киинин эдэр исписэлиистэрэ, оройуоннааҕы ыччат Сүбэтин үлэһиттэрэ Баал алыптаах түһүлгэтин астылар. Нэһилиэктэртэн, улуус кииниттэн, куораттан уон паара кыттынна. Бастыҥ үҥкүүһүттэринэн Адыаччы нэһилиэгиттэн Сайаана Слепцованы уонна Павел Стручкову ааттаатылар. Үөрүүлээх тэрээһин кэнсиэрин ырыа-тойук, үҥкүү-битии аргыстаах талааннаах эдэр ыччат киэргэттэ. Маны сэргэ, улуус ытыктабыллаах бэтэрээннэрэ Ыччат сылын бэлиэтин түмсүүлэр салайааччыларыгар Анна Слепцоваҕа (Боруулаах), Вита Побережнюкка (Эһэ Хайа), Гаврил Акимовка (Адыаччы), Ефросинья Васильеваҕа (Верхоянскай), Алена Рожинаҕа (Баатаҕай), Тамара Андросоваҕа (Дулҕалаах), Гаврил Протопоповка (Арыылаах), Акулина Слепцоваҕа (Остуолба), Светлана Ласковаҕа (Үөттээх), Мирослава Гороховаҕа (Боронук), Варвара Матвееваҕа (Эҥэ), Мария Окладниковаҕа (Элгэс) туттардылар. Ыраахтан кэлбит ыҥырыылаах ыалдьыттар Ирина Иванова уонна Ариан Сергеев баһылыгы бастакы солбуйааччы Н.Корниловка Ыччат сылын былааҕын, элбэх оҕолоох ийэҕэ, Баатаҕайдааҕы Оҕо ускуустубаҕа оскуолатын преподавателигэр С.Чириковаҕа Махтал суруктарын туттардылар. Николай Корнилов улуус баһылыгын Эҕэрдэ суругун аахта, мустубут дьону үөрүүлээх түгэнинэн эҕэрдэлээтэ. Сыл аайы өрөспүүбүлүкэҕэ ыытыллар «Лучший филиал» күрэскэ иккис миэстэни ылбыт Дьиэ кэргэҥҥэ уонна ыччакка социальнай-психологическай көмө киинин филиалын салайааччытыгар А.Бочкареваҕа улуус баһылыгын аатыттан «Ыччат бэлиитикэтэ сайдыытыгар кылаатын иһин» Махтал суругу уонна сэртипикээти туттарда. Эмиэ итинник Махтал суругунан Боруулаах нэһилиэгин лиидэрэ А.Слепцова, ХИФУ устудьуона, «Хайа сахалара» түмсүү лиидэрэ К.Стручкова, Арыылаах нэһилиэгин дьаһалтатын исписэлииһэ У.Слепцова, Боронук орто оскуолатын учуутала С.Ноговицына наҕараадаланнылар.
