Вахтанан үлэлиири сөбүлээтилэр
Сунтаар улууһуттан элбэх эдэр дьон «АЛРОСА» АК тэрилтэлэригэр, «Анаабыр алмаастара» хампаанньаҕа сорохторо бастайааннай төрүккэ, атыттара вахта ньыматынан үлэлии-хамсыы сылдьаллар. Маныаха Дьарыктаах буолуу киинэ (дир.А.М.Николаев) хаһыс да сылын Үлэ дьаарбаҥкатын тэрийэн ыытар. Онно кыттыбыттар үксүлэрэ үлэни булаллар. Сүрүн ирдэбиллэринэн идэни баһылааһын, билии-көрүү уонна доруобуйа буолар. Төһүү күүһүнэн былырыын олунньуга «АЛРОСА» АК, СӨ Дьарыктаах буолуу департамена уонна «Сунтаар улууһа (оройуона)» МТ икки ардыларыгар бииргэ үлэлэһэр туһунан үс өрүттээх Сөбүлэһиигэ илии баттаспыттара буолар. Онно этиллэринэн, алмаас хампаанньата биһиги улууспут дьонун үлэҕэ ылыахтаах. Киин билигин онно олоҕуран үлэлии-хамсыы олорор. Саҥа дьыл буолуон аҕай иннинэ биһиги «АЛРОСА» хампаанньа иһинэн үлэлиир МУАД (Мииринэйдээҕи суол управлениета) тэрилтэҕэ вахта ньыматынан үлэлиир икки уолу кытта кэпсэттибит. Ол курдук, Дмитрий Еремеев уонна Виктор Семенов үлэҕэ киирэннэр буһа-хата сылдьаллар. Кинилэртэн Дмитрий вахтаҕа икки ый үлэлээн баран, сынньалаҥар кэлэ сылдьар. Кини МУАД-ка олунньуттан үлэлиир. Мииринэй уонна Өлөөн оройуоннара быысаһан сытар Мууна үрэҕин оройуонугар саҥа көстүбүт алмаастаах сиргэ (Верхне-мунское месторождение) суол тутуутугар үлэлиир. Бу суол тутулуннаҕына манан Удачнайдааҕы хайаны байытар кэмбинээккэ (ХБК) руданы таһыахтара. Аҥардас кинилэр вахталарыгар араас улуустартан барыта 70-ча киһи баар эбит. Олортон үксүлэрэ сунтаардар. Графиктара сарсыарда 8-тан киэһэ 8-ка диэри. Бары сылаас, тупсаҕай оҥоһуулаах евровагоннарга олороллор. Хамнастара да добуочча, 120 тыһ. солк. тиийэ. Онон кини вахтанан үлэлиир бары өттүнэн табыгастааҕын этэр. Онтон Үөһээ Бүлүүттэн сунтаардарга күтүөттээн кэлбит Виктор Семенов МУАД-ка эмиэ суол тутуутугар нэдиэлэ курдук погрузчик-машинист идэтигэр стажировкаламмыт. Ону тэрилтэ бэйэтэ ирдиир эбит. Виктор бырамыысыланнаска үлэлии үөрүйэх. Бу иннинэ түөрт сыл кини «Анаабыр алмаастарыгар» үлэлээбит. Стажировкатын биһирээбиттэр. Онон аны олунньуга барыахтаах. Үлэлиир усулуобуйалара үчүгэйин, техникалара барыта саҥаларын, миэстэтигэр анал таҥаһынан хааччыйалларын кэпсиир. Дмитрий уонна Виктор бу үлэни улуустааҕы Дьарыктаах буолуу киинин нөҥүө булбуттар. Түгэнинэн туһанан улуус баһылыгар Анатолий Васильевич Григорьевка уонна улуустааҕы Дьарыктаах буолуу киинин дириэктэригэр Александр Макарович Николаевка махтаналлар.
