Киинэ бастакы бэстибээлэ бэртээхэй буолла
«Бартыһаан» култуура киинигэр Арассыыйаҕа — киинэ, улууска — гражданскай көҕүлээһин, «Саха» НКИХ Сунтаардааҕы филиала 25 сылыгар аналлаах «Сунтаар сулуһа» диэн улуустааҕы киинэ бастакы бэстибээлэ үрдүк таһымнаахтык ыытылынна. Тэрээһиҥҥэ «Саха» НКИХ филиалларын кытары үлэлиир сулууспа начаалынньыга Александр Лебедев, телебырайыактарын эрэдээксийэтин эрэдээктэрэ, СӨ култуура үтүөлээх үлэһитэ Наталья Михалева-Сайа, телевидениенэн биэриилэри эпииргэ аттаран туруорар сулууспа начаалынньыга Саймон Сергеев ыҥырыылаах ыалдьыттарынан буоллулар. Ону сэргэ СӨ култуура үтүөлээх үлэһитэ, «Рублев» уонна «Утро долгого дня» киинэлэргэ уһуллубут Фрументий Софронов кэргэнинээн Нина Потаповалыын, «Его дочь» киинэҕэ сүрүн оруолу толорбут, «Окно в Ев-ропу» арассыыйатааҕы киинэ бэстибээл сүрүн бирииһин хаһаайына буолбут Прокопий Яковлев кэргэнинээн СӨ култуура туйгуна Светлана Яковлевалыын, үс сиэрийэлээх Аҕа дойду улуу сэриитин көрдөрөр «Сэрии биһиги дьылҕабытыгар» киинэ уонна «Сэргэлээххэ» диэн устудьуоннар сериалларын режиссера Эльвира Егорова кытыннылар. Манна улуус араас нэһилиэктэриттэн ураты ис хоһоонноох, интэриэһинэй барыта 22 киинэ киллэриллибит. Бэлиэтээн эттэххэ, бу киинэлэри дьүүллүүр сүбэ бэстибээл буолуон иннинэ «Дархан» киинэ тыйаатырыгар биирдиилээн көрөн, ырытан, түмүк таһаарда. Онтон түөрт бастыҥ киинэни «Дархан» киинэ тыйаатырыгар үс күн устата олохтоохторго анаан көрдөрдүлэр. Түмүккэ, бастакы киинэ бэстибээлин Гран-при хаһаайынынан Василий Васильев режиссердаах «Муҥ маһы кэрийбэт» киинэ (Дьаархан) буолла. 50 тыһ. суумалаах сэртипикээт туттарылынна. Номинаннарынан «Выжившая» (реж. Лидия Ларионова, «Аргыс» киинэ устуудьуйа) уонна «Даасыкка дьылҕата» (реж. Анна Тотонова, Кэмпэндээйи) киинэлэр ааттанан, эмиэ ыалдьыттар биһирэбиллэрин ыллылар. Ону таһынан бу күн бастыҥ оператор, бастыҥ звукорежиссер, бастыҥ дьахтар уонна эр киһи оруоллара, сценарийы бастыҥ суруйааччы ааттаннылар. Улуустааҕы ыччат политикатын отделын көҕүлээһининэн ыытыллыбыт «Мы за единую цель, мы за ЗОЖ!» диэн ааттаах улуустааҕы эдэр ыччат социальнай видеороликтарын күрэһин түмүгүн эмиэ бу күн биллэрдилэр. Уопсайа 10 видеоролик киирбититтэн, кыайыылааҕынан Ярослав Филиппов буолла уонна «Сахафильм» национальнай хампаанньаҕа стажировкаланарга сэртипикээт тутта. «Улууспутугар киинэни сэргиир, сөбүлүүр элбэх талааннаах дьон бааллара биһигини олус үөрдэр», – диэн хас биирдии ыалдьыт сонун тэрээһин туһунан санаатын үллэһиннэ. Ити курдук Киинэ сылын түмүктүүр бастакы киинэ бэстибээлэ биир санаалаах элбэх дьону түмтэ, саҥа талааннары арыйда.
