Бырабыыталыстыба үлэтин отчуоттуур бөлөх Орто Халыма куорат саҥа тутууларын көрдө
Орто Халыма улууһугар СӨ Бырабыыталыстыбатын 2016 сыллааҕы үлэтин отчуоттуу сылдьар бөлөх Орто Халыма куорат саҥа тутууларын көрдө. Министиэристибэлэр салайааччылара, солбуйааччылара уонна бэрэстэбиитэллэрэ „Ярмонга“ диэн саҥа атыы-эргиэн офиһыттан саҕалаатылар. Тутуу бастакы этээһэ ырыынак буолан турар, оттон иккис этээһигэр офис быһыытынан үлэлиэхтээх. Улуус дьаһалтатын баһылыга Евгений Слепцов бизнес-инкубатор арыллар түбэлтэтигэр ханнык өҥөлөр оҥоһуллуохтарын сөбүн кэпсээтэ. Салгыы былырыын капитальнай өрөмүөннэммит улуустааҕы киин балыыһаны, күһүн үлэҕэ киириэхтээх 75 миэстэлээх оҕо саадын, Социалистическай үлэ Геройун И.В. Волков аатынан улуустааҕы гимназияны көрдүлэр. Ону таһынан „Южная“ хочуолунай, халаан уутуттан эмсэҕэлээбит дьоҥҥо тутуллубут дьиэлэр кыһалҕаларын кытта билистилэр.